مارد شعر

يوم الشعر شق الصدر وتخالفت حدب الضلوع
ما قلت للكلمة هلا طال الجفا يا الغايبة




ولا توّسلت الشعر لين أنهمر كيف الدموع
(مارد شعر) في داخلي كم له يجي وأحاربه




ويوم أنكتب حرفي غلب واستوطن إحساس الجموع
لأن الشعر عالي قدر حرفه يوجّب صاحبه




استحوذت كلمة فمي ع الآدمي رغم الطبوع
رغم اختلاف الأمكنة والألسنة المتضاربة




شاعر وأقدّر من يقدّر منهجي فكر ٍ ولاع
جمهوري اللي من عرفته ما عرفت النايبة




عشقي ليا دنّ الجرس صهوة فرس حرّة جزوع
عذرا تدسّم من تبسّم بالرضا لي شاربه




راسي سَما فوق السّما في غايتي ماني قلاع
ما هدِّني طول المدى وهرج العدى المتكالبة




مهما حَكَوا وتلاوكوا ما للحكي عندي سموع
والهرجة اللي ما تزلزل ما تعدّى الخايبه




ودام الشعر ما جيت له وأضويت له كفي شموع
يحق لي مهما كبر راسي على اللي طالبه