الوطن

ما نما بك حلم واحد قد حلمك في وطن
تفتخر فيه وتنادي آنا من هذا التراب




تروي رماله بدمك لجل ما ينبت كفن
يستر عظامك ويرفع حاجبك يوم الحساب




تزرعه حب وأماني وتحصده غالي الثمن
نبت ٍ بأصغر عيالك ينفعه وقت الغياب




الوطن ما هو هويّة ولا تجارة ولا سكن
الوطن شي ٍ تحسه يسندك وقت الصعاب




تلتجي له لا تعقّل طيشك وجنّك هدن
ويقبلك في كل حاله رغم علمك بالعقاب




الوطن أطهر من إنه يلتصق فيه العفن
طهّر إيمانك ونقّي ما علق به من شواب




وأرجع بقلب ٍ يقينه صادق ٍ ما به وثن
افتح الباب وضميرك أسأله وقت الإياب




الوطن يستاهل إنك تزرع بقلبه فتن ؟
أو تكون بيّد غيره آله ولعبة خراب




يا خي معنى انتمائك للوطن إنك وطن
تحمل إحساس ٍ بحبه من ترابك للسحاب